Zion Community Garden
Zion Lutheran Church chuan Pathian hnen atanga rawngbawlna tur hriattira an awm hnu, mahni thenawm khawveng a Isua hmel lan tir hna an tan atanga rawn irh chhuak, biakin hnung lama kohhran member leh thenawm khawveng te tana huan ram an theh chu kan hlim pui hlawm ta ngang mai. “…i dam chhung zawngin rin taka thawkin a rah i ei tawh ang…” (Gen.3:17) a tih hnua Thuhriltu Mifinga meuh pawhin thil THA a hmuh chhun, …”ei leh in te leh a thawhrimnaa a rilru tihnawm…” chu a takin kan tem tan ta a ni ber e. Hei pawh hi Pathian kuta mi a ni” (Thuhriltu 2:24).
ZLC kum tir an DMCF tan plot 20 min pe liau liau a. Huan siam duh kan hnih thum avangin plot 5dang min sem belh leh ta a nia, kan tan hian an vo phalin an tha tak mange. Engtin nge Pathian that zia kan chunga an lan tir hi kan rulh let ve theih ang. Kan rulh let erawh an phut hauh lo vang, an thatna thinlung hi Lalpa an hmangaihna atanga chhuak a ni si a. Mahse kan chunga an thatna rawn luang lut hi Lalpa thatna kan dawn a ni si a, kan dawn malsawmna chhan let nan engemaw ti tala pek let theih kan neih chuan a tha hle ang. Fel tak leh thianghlim taka huan leh compound enkawl zawng in nge, kan theih tawk a Biakin mamawh bungrua pek zawng in nge? A tha ber erawh tuman kan hre lo mai thei.
ZLC hian huan ram a thlawnin min pe mai a ni lo (Des Moines area ah hian City lam buatsaih huan siamna hmun then khat chu a awm narawh, keini ang thal dawna siam tum ve mai mizia pu tan chuan neih ve theih phak a ni lo tih hre tur talin kan va ngaihven ve tawh hlawm angem aw?), huan tui leih tur min chhawp sak bawk. Mercy-i pa kal khalh ziah theih loh chuan tui chan erawh a harsa deuh an ti. Hahaha…
Tam takin antam kan theh a, Pu Zuala leh Pu J H Hruaia te antam theh baka to buk a awm lo. An theh nge an phul pawh hriat a ni love. Marci-i pa anthur tuh a to ngil ber a, anthur chauh a ching erawh “Kum khuain anthur chiah emi ei a tum?” tih zawhna a ti tam deuh. Pi Lucy-i pawhin a huan a hmuh hmain a hungna tur a lei diam tawh a, a hung zawhah phei chuan an tha viau tura beisei a ni. Laura-i nu chuan maian zamna tur thing cross in phun sa a nei a, mahse a zam tur maian a to thei hrih lo deuh. Chitih rualin Pi Mavuli pawhin inkhawm bana a huan va melh zeuh zeuh nuam a ti hle nia hriat a ni bawk. Pu Khumtea’n a ngainat ber anhling tlim khah a tuma a huan tui pe tur chuan Duati pa a ringtawk hle bawk. A lo pe tha lo deuh a nih pawhin pawi a ti lo, mi tinin huan a rualin kan kan chuang lo tih a chiang a. Soccer khel phaha nauawm hlen chuan tawk viau ee” tiin Remruata’n an nu ngaihdam dan tur a hril lawk a, a dik kan ring tlang. Kan huan nei kan hlim tlang bawka kan tlak ta duah a ni, tun kan ngaihaw long chu.
Kan hriat tlan atan a tha a awm. Huan siam chuan TUI mawlh hi a pawimawh. Tupawhin kan thlai tui pek tumin tlai lamah chuan huan kan pan sap sap a, a hlim pawh a hlim thlak narawh. Kan thlaite than len nan a pawimawh em bawk a ni. Kan thenawm khawveng tuemaw tlawmngaiin an tui min sem phal mai ni lovin, huan kiangah Gallon 2400 lai mai leng tui zel lian tha tak mai min rawn hun sak a, lawmthu sawi ta kan awm tawh emaw. Tui an lo dah khah thap chuan huan tui leih pawh nuam sing khaw ni ringawt mai. Mahse…tui zema tui a lo awm loh palh in engtin nge??? Vui mai thei kan ni lo, a hnuai kawra tui chawi mai kha a fin thlak zawk ngei ang. Tin kan thlaite tui kan pekin tui hek lo leh thlaiin a chan tam theih dan tur kan ngaihtuah thiam pawh a pawimawh viau ta ve ang. Tui zem lian khat min dah sak hian kan huan zawng zawng hian kar khat tla turah min ngaih sak a ni tih kan hre dawn nia. An dah tam tawk lo pawhin tui ren dan pawh thiam ila a tha viau ang. Des Moines tui man (rate) hria kan awm emaw chu!!! Des Moines hmun tinah in ang lo thluahin ZLC vengah sawn engzat chiah nge a nih hre kil kel lo mah ila a laihawla chhut dawn chuan Gallon 1000 ah $6 in a chhut theih awm e. Chuti ni se tui zem khat min dah sak hian min petu hian $14.40 a seng zel dawn tihna a ni. Zan tin zem khata tui in dah sak chi chu a ni lo deuh a ni. Hre thiam mai em.
Hetia duhsakna kan dawng hi kan hmel that viau vang chu a ni lo chiang a, kan zaipawl an zai fuh deuh vang pawh kha a nih a rinawm lo. ZLC hian Pathian hmangaihna kan chungah a takin an rawn ti lang tak tak zawk a ni. Keini pawh hian Lalpa thatna zar kan zo hi hlim pui ngei ila, kan huan thlai thar te in Amah kan chawimawi let ve ngei theih nan, kan thlai chinte Lalpa’n a tharin malsawm mawlh teh se!!!!